ការដាំត្រកួន

ហេតុផលល្អៗ ដែលនាំឲ្យយើងដាំត្រកួន

-​ មានជីវជាតិច្រើនសំរាប់ចិញ្ចឹមរាងកាយ

- ងាយស្រួលដាំ ថែទាំ និងងាយស្រួលលក់នៅទីផ្សារ

- ឆាប់បានប្រមូលផល និងប្រមូលបានច្រើនដង

-​ អាចដាំដុះបានលើដីគ្រប់ប្រភេទ និងគ្រប់រដូវ ឲ្យតែមានទឹកគ្រប់គ្រាន់

- ដើម ស្លឹក យកទៅធ្វើម្ហួបបានច្រើនមុខ និងមានរសជាតិឆ្ងាញ់សំរាប់មនុស្ស និងអាចធ្វើជាចំណីសត្វក៏បាន (ជ្រូក មាន់)

- ងាយស្រួលក្នុងការថែរក្សាគ្រាប់ពូជ

លក្ខណៈទូទៅរបស់ត្រកួន៖

ត្រកួន ជារុក្ខជាតិត្រូវការពន្លឺថ្ងៃ និងទឹកគ្រប់គ្រាន់ វាអាចដុះលូតលាស់លើដីគ្រប់ប្រភេទ ជាពិសេសដីល្បាយខ្សាច់ ដែលមានជីជាតិ ហើយ យើងអាចដាំវាបានគ្រប់រដូវ ទាំងនៅលើដី និងក្នុងទឹក។

តើត្រកួនមានសារធាតុអ្វីខ្លះ?

ត្រកួនជាបន្លែលដែលមានសារធាតុសំខាន់សំរាប់រាងកាយរសប់យើងដូចជា៖

- វីតាមីនសេ ជួយរក្សាធ្មេញនិងអញ្ចាញធ្មេញឲ្យមានសុខភាពល្អ បង្កើនសមត្ថភាពទប់ទល់ឬភាពស៊ាំនិងជំងឺផ្សេងៗ។

- វីតាមីនអា ជួយឲ្យភ្នែកភ្លឺ មើលឃើញបានល្អ។

- ប្រូតេអ៊ីន ជួយដល់ការលូតលាស់ខាងរាងកាយ ជាពិសេសសាច់ដុំ។

- វីតាមីនបេ ជួយឲ្យសរសៃប្រសាទដំណើរការបានល្អ និងបង្កើនការរំលាយអាហារ។

- ជាតិដែក ជួយក្នុងការបង្កើនគ្រាប់ឈាមក្រហម ជាពិសេសស្រ្តីមានផ្ទៃពោះ ត្រូវញ៉ាំត្រកួនឲ្យបានច្រើន។

- កាល់ស្យូម ជាសារធាតុរ៉ែសំរាប់ជួយឲ្យឆ្អឹង និងធ្មេញរឹងមាំ។

ការរៀបចំត្រកួន

​ចង់ឲ្យត្រកួនដុះលួតលាស់បានល្អ យើយត្រូវរើសទីកន្លែងដាំ និងធ្វើរងឲ្យបានត្រឹមត្រូវស្របតាមរដូវនីមួយៗ។

ការជ្រើសរើសទីកន្លែងដាំ

ការជ្រើសរើសទីកន្លែងដាំជាការសំខាន់បំផុតដើម្បីជៀសផុតពីការខូចខាត និងដើម្បីទទួលផលបានច្រើន។

រដូវប្រាំង ជ្រើសរើសទីកន្លែងដាំជិតប្រភពទឹក ដើម្បីងាយស្រួលក្នុងការស្រោចស្រព។

រដូវវស្សា

ជ្រើសរើសទីកន្លែងដាំនៅលើដីទួលខ្ពស់មិនលិចទឹក

ចំណាំ៖ ត្រកួនគោកអាចដាំបានគ្រប់រដូវ ឲ្យតែដីធូរមានជីវជាតិ និងមានទឹកគ្រប់គ្រាន់។

ការធ្វើរងដាំ

ឧបករណ៍រៀបចំដី និងជីទ្រាប់បាតរង៖ 

- ចបជីក ចបកាប់

- រនាស់ដៃ

- បង្គី

- ជីកំប៉ុស្ត ជីលាមកសត្វ

ការធ្វើរងដាំនៅរដូវវស្សា

១. កាប់ដីហាលរយៈពេល ១០ថ្ងៃ ទុកឲ្យស្ងួត ទើបវាយបំបែកដីឲ្យម៉ដ្ឋ។

២. លើករងត្រកួនដែលមានទទឹង ១ម៉ែត្រ កំពស់ ១តឹក ឯបណ្តោយអាស្រ័យទៅតាមស្ថានភាពដីវែង ឬខ្លី។

ការធ្វើរងដាំនៅរដូវប្រាំង

១.​ កាប់ដីហាលរយៈពេលមួយអាទិត្យ បន្ទាប់មកវាយបំបែកដីឲ្យម៉ដ្ឋ។

២. លើករងដាំដែលមានទទឹង ១ម៉ែត កំពស់ ១តឹក និង បណ្តោយអាស្រ័យទៅតាមស្ថានភាពដីវែង ឬខ្លី។

            *ហេតុអ្វីបានជាត្រូវលើករងឲ្យខ្ពស់?

            =>ដើម្បីការពារទឹកដក់ ឬលិចរងពេលមានភ្លៀងធ្លាក់ជោកជាំ។

ការដាក់ជីទ្រាប់បាត

អ្នកដាំគួរយល់ដឹង ៖ ត្រូវរោយជីកំប៉ុស្ត ឬជីអាចម៍គោដែលពុកផុយ ចំនួនពី ៣ ទៅ ៥ គីឡូ នៅលើដី១ម៉ែតបួនជ្រុង។

- យកជីកំប៉ុស្ត ឬជីលាមកសត្វផ្សេងៗ ដែលពុកផុយ មករោយពីលើរង។

- យកចប់កាប់មកជ្រំៗដី ត្រឡប់សារចុះ សារឡើងដើម្បីឲ្យជីចូលទៅក្នុងដី។

- យករនាស់ដៃមករាស់ដីឲ្យបានស្មើល្អ។

* ជៀសវាង៖  មិនត្រូវយកជីកំប៉ុស្តទៅចាក់គរទុកចោលនៅលើរង ដោយមិនជ្រំត្រឡប់នោះទេ ព្រោះវាធ្វើឲ្យសារធាតុចិញ្ចឹមនៅក្នុងជីហើរទៅតាមខ្យល់។

ការដាំត្រកួន

ដើម្បីឲ្យគ្រាប់ពូជដុះបានល្អ យើងត្រូវយកគ្រាប់ពូជណាដែលគ្មានជំងឺ គ្មានការបំផ្លាញពីសត្វល្អិត និងមិនទុកយូរឆ្នាំពេក។

ការរៀបចំគ្រាប់ពូជ

សំភារៈសំរាប់បណ្តុះ និងវត្ថុធាតុដើមសំរាប់ដាំមានដូចជា៖

- កូនឈើសំរាប់ឆូតរងដាំ

- ចង្អេរ

- ចានដែក

- ក្រណាត់សំរាប់ខ្ចប់

- គ្រាប់ពូជត្រកួន និង

- កំទេចចំបើង

របៀបបណ្តុះ

- ត្រូវហាលគ្រាប់ពូជនៅពេលថ្ងៃស្រទន់ គឺចន្លោះពីម៉ោង៨ដល់ម៉ោង១១ព្រឹករយៈពេល១ទៅ២ម៉ោង ដើម្បីសម្លាប់មេរោគដែលនៅជាប់នឹងគ្រាប់ ហើយ បើហាលគ្រាប់ពូជនៅក្រោមថ្ងៃក្តៅខ្លាំធ្វើឲ្យគ្រាប់ពូជឆ្អិនពេក ជាហេតុនាំឲ្យគ្រាប់មិនដុះ។

-​ យកគ្រាប់ពូជមកអុំរោយ និងរើសកំទេចកំទីសំរាមចោល។

- ត្រាំគ្រាប់ពូជក្នុងទឹករយៈពេល១២ម៉ោង (១យប់)។

- ស្រង់គ្រាប់ពូជ រួចយកក្រណាត់មកខ្ចប់ និងផ្សើមទឹកឲ្យសើមៗជានិច្ច ផ្អាប់ទុកពី ១ ទៅ២យប់ ដើម្បីឲ្យគ្រាប់ដុះពន្លក ទើបយកទៅដាំ។

ការសាបគ្រាប់  ឬការដាំ

របៀបដាំ

- ឆូតកូនចង្អូរកាត់ទទឹងរងជំរៅ១សង់ទីម៉ែត្រនៅរដូវប្រាំង និង២សង់ទីម៉ែត្រ នៅរដូវវស្សា។

- ឆូតរងដាំដោយទុកចន្លោះពីចង្អូរមួយ ទៅចង្អូរមួយ ចម្ងាយកន្លះតឹក នៅរដូវប្រាំង និង ១តឹកនៅរដូវវស្សា។

- រោយគ្រាប់ដោយទុកចន្លោះពីគ្រាប់១ ទៅគ្រាប់១ ប្រវែងមួយសង់ទីម៉ែត្រ នៅរដូវប្រាំង និងប្រវែងពីរសង់ទីម៉ែត្រនៅរដូវវស្សា។ ការរោយគ្រាប់តាមកូនចង្អូរត្រូវឲ្យស្មើល្អ នៅលើផ្ទៃដី១ម៉ែត្របួនជ្រុង ត្រូវប្រើគ្រាប់អស់ចំនួន៥ក្រាម។ ក្រោយពីរោយគ្រាប់ត្រកួនរួច ត្រូវយកកំទេចចំបើង ឬកំទេចស្លឹកឈើ គ្របពីលើដើម្បីការពារកុំឲ្យហួតសំណើម។

ការថែទាំមុនពេលប្រមូលផល

ដំណាំត្រកួនមិនពិបានថែទាំទេ គឺយើងគ្រាន់តែដកស្មៅ ស្រោចជី និងស្រោចទឹក ឲ្យបានគ្រប់គ្រាន់ប៉ុណ្ណោះ។ ដំណាំត្រកួនត្រូវការទឹកច្រើន ប្រសិនបើខ្វះទឹក ដើមត្រកួនលូតលាស់មិនបានល្អនោះទេ វាក្រិន ឬរឹង។ នៅរដូវប្រាំង ក្រោយពីដាំហើយ យើងត្រូវស្រោចទឹកឲ្យជោក​ មួយថ្ងៃ២ដង (ព្រឹក និងល្ងាច)។ នៅរដូវវស្សា យើងមិនចាំបាច់ស្រោចទឹកនោះទេ ប្រសិនបើមានភ្លៀងដក់ទឹកច្រើន ត្រូវបង្ហូរទឹកចេញពីរង។ ជ្រំដី និងដកស្មៅជុំវិញគល់ត្រកួនឲ្យបានញឹកញាប់ក្រោយពីត្រកួនដុះបានរយៈពេលពី៤ទៅ៥ថ្ងៃ ព្រោះក្នុងរយៈពេលនេះ ស្មៅកំពុងដុះលួតលាស់ប្រជែងជាមួយត្រកួនដែរ។

ការប្រមូលផលត្រកួន

ក្រោយពីដាំរយៈពេល ១៥ ទៅ២៥ថ្ងៃ យើងអាចដក ឬកាត់ត្រកួនបានហើយ។ ហើយការប្រមួលផលមានពីររបៀប គឺការដកទាំងឬស និងការកាត់ដើម។

ការតទាំងឬស

យើងប្រើដៃចាប់ដកត្រកួនទាំឬសថ្នមៗ រួចដាក់ក្នុងកញ្ច្រែង បន្ទាប់មកលាងសំអាតដី ដែលជាប់នឹងឬសឲ្យបានស្អាត តែការប្រមួលផលដោយដកទាំឬសធ្វើឲ្យយើងខាតបង់លុយច្រើន។

ការកាត់ដើម

យើងប្រើកូនកាំបិត ដើម្បីកាត់ដើមត្រកួន ដើយទុកគល់ពីដីប្រវែង ២ទៅ៣សង់ទីម៉ែត្រ ដើម្បីឲ្យត្រកួនលាស់ត្រួយថ្មី។ យើងអាចកាត់ត្រកួនបានចាប់ពី៤ ទៅ១០ដង រហូតដល់ត្រកួនលែងដុះលួតលាស់ទៀត ដូចនេះការប្រមូលផលដោយការកាត់គឺចំណេញ់ជាងការប្រមូលផលដោយការដកទាំឬស។